Təsəvvür edin: İlk WordPress veb-saytınız nəhayət hazırdır və işləyir. Aylardır özünüzü heç bu qədər nailiyyət qazanmış hiss etməmişdiniz. Özünüzə layiqincə təşəkkür edirsiniz, zəhmətinizin bəhrəsini əldə etməkdə sizə kömək edən insanlar da həmçinin. Lazım olan plaginləri quraşdırırsınız və saytınızın gələcəyi üçün daha geniş planlar qurmağa başlayırsınız. Hər şey parlaq görünür və əla gedir.
Ağlasığmaz bir şey baş verənə qədər. Və saytınız çökür.
Çiyinlərinizi çəkirsiniz. Belə şeylərin ən yaxşı mütəxəssislərin belə başına gəldiyini eşitmisiniz. Əlbəttə, əminsiniz ki, Mark Zukerberq və Devid Karp da əvvəllər belə bir şeylə üzləşiblər və indi hər ikisinin vəziyyəti əladır, elə deyilmi?
Beləliklə, çarə tapmaq üçün həyəcanla Google-da axtarış edərək saytı yenidən işlək vəziyyətə gətirməyə çalışırsınız. İlk cəhddə alınmır. İkincidə də alınmır – nə üçüncüdə, nə dördüncüdə, nə on yeddinci, hətta nə də iyirmi ikincidə. Tamamilə və büsbütün çarəsiz qaldığınızı anlayanda gözləriniz bərələ qalır; veb-saytınız həmişəlik itib-batıb. Çıxış yolu üçün interneti ələk-vələk edirsiniz, lakin təlimat saytlarının demək olar ki, hamısı eyni şeyi deyir:
Ən başından WordPress fayllarınızın ehtiyat nüsxəsini çıxarmalı idiniz.
Ən başından WordPress fayllarınızın ehtiyat nüsxəsini çıxarmalı idiniz.
Ən başından WordPress fayllarınızın ehtiyat nüsxəsini çıxarmalı idiniz.
Ən yaxşı halda, veb-sayt sahibinin ən qorxulu kabuslarından biridir. Bu, məhz qarşısını almaq istədiyimiz bir vəziyyətdir, bəs bunun qarşısını necə ala bilərik? Əslində, cavab olduqca sadədir: Yaxşı bir ehtiyat nüsxələmə (backup) plagini quraşdırmalıyıq.
Necə və Haradan Başlamalı?
WordPress saytınızın ehtiyat nüsxəsini çıxarmağın ilk addımı məhz nəyin nüsxəsini çıxarmaq lazım olduğunu dəqiq bilməkdir. WPBeginner özünün “Which WordPress Files Should You Backup? And the Right Way To Do It” adlı məqaləsində bu iş üçün ehtiyat nüsxəsi çıxarılmalı olan zəruri faylları aşağıdakı kimi sadalayır:
- Əsas WordPress Faylları (Core Files)
- wp-content Qovluğundakı Fayllar (mövzunuz, plaginləriniz və yükləmələriniz)
- WordPress konfiqurasiya faylı
- WordPress Verilənlər Bazasınız
Ehtiyat Nüsxələmə Barədə Bir Qədər Ətraflı
WordPress təkbaşına saytınız üçün daxili təhlükəsizlik və ehtiyat nüsxələmə sistemləri ilə birlikdə gəlmir (baxmayaraq ki, onları əl ilə quraşdırmağı öyrənə bilərsiniz – bu isə xeyli vaxt aparacaq), buna görə də çətinlikləri azaltmaq üçün bir yol tapmaq sizin ixtiyarınızdadır. Saytınızı yeniləmək onsuz da vacibdir (hər ehtimala qarşı saytınıza yeni bir şey, məsələn, başqa bir plagin əlavə etmək istədikdə və ya nəyisə silmək istədikdə), məlumatları itirmək istəmirsinizsə ehtiyat nüsxələr mütləqdir (əlbəttə ki, istəməzsiniz). Saytınızın nüsxəsini çıxarmaq və təhlükəsizliyi gücləndirmək üçün digər səbəblərə saytın hakerlərdən qorunması və heç kimin saytınızın məlumatlarını oğurlaya bilməməsi daxildir.
“Bunun Üçün də Plagin Var.”
WordPress hər növ funksiya üçün saysız-hesabsız plaginlərə malikdir, o cümlədən (bəli, düz təxmin etdiniz) təhlükəsizlik və ehtiyat nüsxələmə tədbirləri üçün də bir çox plagin var. Seçə biləcəyiniz bu cür plaginlər olduqca çoxdur; daha populyar olanlardan bir neçəsi BackupBuddy və UpDraftPlus-dur. Bu plaginlər (və daha çoxu) haqqında rəyləri demək olar ki, hər yerdə tapa bilərsiniz, ona görə də narahat olmayın – internetin sehrli gücü arxanızdadır. Şəxsən biz həm təhlükəsizlik, həm də ehtiyat nüsxələmə üçün aşağıdakı səbəblərə görə VaultPress-dən istifadə edirik:
- VaultPress, Automattic tərəfindən yaradılmışdır – WordPress-in özünün əsasını qoyan eyni şəxs– Matt Mullenweg tərəfindən təsis edilmişdir. Automattic-in məhsul və xidmətlərinin çoxu, hətta demək olar ki, hamısı olduqca etibarlıdır və artıq sınaqdan keçmiş plaginlərə abunə olmaq heç vaxt pis fikir deyil.
- Əksər ehtiyat nüsxələmə plaginlərindən fərqli olaraq, VaultPress yaddaş sahəsi tələb etmir. Onlar məlumatlarınızı öz serverlərində saxlayırlar, buna görə də veb hostinqinizdən heç bir “server sahəsini çox tutursunuz” bildirişi almayacaqsınız.
- Sadəlik. İstifadə etmək üçün sadəcə istifadəçi interfeysinizə daxil olmaq kifayətdir və bütün ehtiyat nüsxələmə detallarına baxa, əməliyyatları oradan icra edə bilərsiniz.
İndi isə, VaultPress bizim şəxsi tələblərimizə cavab verdiyi üçün işimizə mükəmməl şəkildə yarayır. Lakin, VaultPress sizi qane etmirsə, qərar verməkdə çətinlik çəkdiyiniz təqdirdə bir çox sayt – məsələn, WPBeginner və wpmudev – adi müqayisə və qarşılaşdırma məqalələri təklif edir.
Hər Şey Sizin Əlinizdədir
Nəticə etibarilə, veb-saytınızı qorumaq və ehtiyat nüsxəsini çıxarmaq qərarı tamamilə sizə bağlıdır. Bəzi insanlar təhlükəsizliyi təmin edilməmiş saytın yaratdığı risklərlə üzləşə biləcəklərinə inanırlar… bəziləri isə inanmır – və bu tamamilə normaldır. Hər halda, peşman olmaqdansa ehtiyatlı olmaq daha yaxşıdır.
Hansı qərarı seçsəniz də, seçimlərinizi hər zaman ölçüb-biçməyi unutmayın. Axı nəyin öhdəsindən gələ biləcəyinizi yalnız siz qiymətləndirə bilərsiniz.
Uğurlar!