Fikiria hili: Tovuti yako ya kwanza ya WordPress, hatimaye inafanya kazi na iko hewani. Hujawahi kujihisi umefanikiwa hivi kwa miezi kadhaa. Unajipongeza kwa stahili, na vivyo hivyo watu waliokusaidia kutimiza tunda la kazi yako. Unasakinisha programu-jalizi unazohitaji, na kuanza kupanga zaidi kuhusu mustakabali wa tovuti yako. Inaonekana yenye matumaini, na kila kitu kinaenda vyema kabisa.
Hadi jambo lisilofikirika linapotokea. Na tovuti yako inaanguka.
Unashusha mabega. Umewahi kusikia kuhusu jambo kama hili likitokea, hata kwa watu bora zaidi. Lo, una uhakika Mark Zuckerberg na David Karp wamewahi kukumbana na jambo kama hili hapo awali, na wote wawili wanaendelea vyema sasa, sivyo?
Kwa hivyo unajaribu kuirudisha hewani, ukitafuta suluhu kwa pupa kwenye Google. Haifanyi kazi mara ya kwanza. Wala haifanyi kazi mara ya pili– au ya tatu, au ya nne, au ya kumi na saba, na hata ya ishirini na mbili. Macho yako yanakodoka kwa kugundua kwamba umeangamia kabisa bila matumaini; tovuti yako imepotea milele. Unavinjari mtandao kutafuta suluhisho, lakini takriban tovuti zote za maelekezo zinasema kitu kilekile:
Ulipaswa kuweka nakala rudufu ya faili zako za WordPress tangu mwanzo.
Ulipaswa kuweka nakala rudufu ya faili zako za WordPress tangu mwanzo.
Ulipaswa kuweka nakala rudufu ya faili zako za WordPress tangu mwanzo.
Mojawapo ya jinamizi baya zaidi la mmiliki wa tovuti, kusema ukweli. Hili ndilo hasa jambo tunalotaka kuepuka, kwa hivyo tunalizuiaje hasa? Kweli, jibu ni rahisi kiasi: Tunahitaji kusakinisha programu-jalizi nzuri ya nakala rudufu.
Jinsi na Mahali pa Kuanzia?
Hatua ya kwanza katika kuweka nakala rudufu ya tovuti yako ya WordPress ni kujua hasa kile unachohitaji kukihifadhi nakala rudufu. WPBeginner, katika makala yao “Which WordPress Files Should You Backup? And the Right Way To Do It”, yafuatayo yameorodheshwa kama faili muhimu zinazohitajika kuhifadhiwa nakala rudufu kwa ajili ya kazi hii:
- Faili za Msingi za WordPress
- Faili zilizo katika Folda ya wp-content (mandhari yako, programu-jalizi, na faili zilizopakiwa)
- Faili ya usanidi wa WordPress
- Kanzidata yako ya WordPress
Ufafanuzi Zaidi Kuhusu Nakala Rudufu
WordPress pekee haiji na mifumo yake yenyewe ya usalama na nakala rudufu kwa ajili ya tovuti yako (ingawa unaweza kujifunza jinsi ya kuiweka wewe mwenyewe kwa mikono– ingawa hilo litachukua muda mwingi), kwa hivyo ni juu yako kutafuta njia ya kupunguza matatizo. Kusasisha tovuti yako daima ni jambo lisilopingika (ikiwa unataka kuongeza kitu chochote kipya, kama programu-jalizi nyingine, au ikiwa unataka kuondoa kitu fulani), na nakala rudufu ni lazima, isipokuwa kama unataka kupoteza data (hautopenda hilo). Sababu nyingine za kuweka nakala rudufu ya tovuti yako na kuimarisha usalama ni pamoja na uhakikisho kwamba haina wadukuzi, na kwamba hakuna mtu anayeweza kuiba data yoyote ya tovuti yako.
“Kuna Programu-jalizi ya Hilo Pia.”
WordPress ina maelfu ya programu-jalizi kwa kila aina ya vipengele, ikijumuisha (naam, umekisia vizuri) kadhaa za hatua za usalama na nakala rudufu. Kuna programu-jalizi lukuki unazoweza kuchagua pia; chache kati ya zile maarufu zaidi ni pamoja na BackupBuddy na UpDraftPlus. Kuna tathmini za programu-jalizi hizi (na nyinginezo) karibu kila mahali, kwa hivyo usijali – maajabu ya intaneti yanakusaidia. Binafsi, tunatumia VaultPress, kwa ajili ya usalama na nakala rudufu zote mbili, kwa sababu zifuatazo:
- VaultPress ilitengenezwa na Automattic– iliyoanzishwa na Matt Mullenweg– mtu yuleyule aliyeanzisha WordPress yenyewe. Bidhaa na huduma nyingi kama si zote za Automattic ni thabiti na za kutegemewa sana, na kamwe si wazo baya kujiunga na programu-jalizi ambazo tayari zimejaribiwa na kuthibitishwa.
- Tofauti na programu-jalizi nyingi za nakala rudufu, VaultPress haihitaji nafasi ya hifadhi. Wanahifadhi vitu vyako kwenye seva zao wenyewe ili usipate arifa zozote za “unatumia-nafasi-kubwa-ya-seva” kutoka kwa mtoa huduma wako wa wavuti.
- Urahisi. Ili kuitumia, unahitaji tu kuingia kwenye UI yako, na unaweza kutazama maelezo yote ya nakala rudufu yako na kufanya shughuli kutoka hapo.
Sasa, kwa sababu VaultPress inakidhi viwango vyetu binafsi, inatufaa kikamilifu. Hata hivyo, ikiwa haujaridhika na VaultPress, tovuti nyingi – kama vile WPBeginner na wpmudev — hutoa makala za kawaida za kulinganisha na kutofautisha endapo utakuwa na ugumu wowote wa kuamua.
Yote Ni Juu Yako
Mwisho wa siku, uamuzi wa kulinda na kuhifadhi nakala rudufu ya tovuti yako au la ni juu yako. Baadhi ya watu wanajiamini kuwa wataweza kukabiliana na hatari zinazoletwa na tovuti isiyo salama… na baadhi ya watu hawajiamini – na hilo ni sawa. Ni bora kujihami kuliko kujuta, kwani kinga ni bora kuliko tiba.
Uamuzi wowote utakaoshikamana nao, daima kumbuka kupima chaguo zako. Kwani, ni wewe pekee unayeweza kupima kile unachoweza kukimudu.
Kila la heri!