Үүнийг төсөөлөөд үз дээ: Таны анхны WordPress вэбсайт эцэст нь ашиглалтад орж, хэвийн ажиллаж байна. Сүүлийн хэдэн сард та хэзээ ч ийм их амжилт гаргаснаа мэдэрч байсангүй. Та өөрийгөө зохих ёсоор сайшааж, таны хөдөлмөрийн үр шимийг бүтээхэд тусалсан хүмүүс ч мөн адил танд баяр хүргэнэ. Та өөрт хэрэгтэй залгаасуудаа суулгаж, вэбсайтынхаа ирээдүйн талаар цаашдын төлөвлөгөөгөө гаргаж эхэлнэ. Бүх зүйл гэрэлтэй харагдаж, төлөвлөсний дагуу сайхан явна.
Гэтэл санаанд оромгүй зүйл тохиолдох хүртэл. Тэгээд таны сайт унаж гацна.
Та мөрөө хавчина. Шилдгүүдэд хүртэл ийм зүйл тохиолддог талаар та сонссон. Марк Цукерберг, Дэвид Карп нарт ч гэсэн өмнө нь ийм зүйл тохиолдож л байсан байх, одоо тэд хоёулаа зүв зүгээр л явж байна, тийм биш гэж үү?
Ингээд та засах аргуудыг Google-ээс тэчьяадан хайж, сайтоо буцаан ажиллуулах гэж оролдоно. Эхний оролдлогоор болсонгүй. Хоёр дахь оролдлого ч амжилтгүй болно – гурав дахь, дөрөв дэх, бүр арван долдугаар, тэр бүү хэл хорин хоёр дахь оролдлого ч бүтэлгүйтнэ. Та бүрэн сүйрсэн гэдгээ, таны вэбсайт үүрд үгүй болсон гэдгийг ухаарах үед нүд тань томрох болно. Та шийдэл хайж интернэтээр хэсэх боловч бараг бүх заавар зөвлөгөөний сайтууд нэг л зүйлийг хэлнэ:
Та анхнаасаа л WordPress файлуудынхаа нөөц хуулбарыг хийх ёстой байсан юм.
Та анхнаасаа л WordPress файлуудынхаа нөөц хуулбарыг хийх ёстой байсан юм.
Та анхнаасаа л WordPress файлуудынхаа нөөц хуулбарыг хийх ёстой байсан юм.
Энэ бол вэбсайт эзэмшигчийн хамгийн аймшигтай хар дарсан зүүдүүдийн нэг юм. Энэ нь бидний зайлсхийхийг хүсдэг яг тэр зүйл бөгөөд үүнээс хэрхэн урьдчилан сэргийлэх вэ? Хариулт нь тун энгийн: Бид найдвартай нөөцлөлтийн залгаас суулгах хэрэгтэй.
Хэрхэн, хаанаас эхлэх вэ?
WordPress сайтыг нөөцлөх эхний алхам бол яг юуг нөөцлөх шаардлагатайг мэдэх явдал юм. WPBeginner өөрсдийн “Та WordPress-ийн ямар файлуудыг нөөцлөх ёстой вэ? Мөн үүнийг зөв хийх арга зам” нийтлэлдээ дараах файлуудыг энэхүү даалгаварт зайлшгүй нөөцлөх шаардлагатай чухал файлуудаар нэрлэсэн байна:
- WordPress-ийн үндсэн файлууд
- wp-content хавтас дахь файлууд (таны загвар, залгаасууд болон хуулсан файлууд)
- WordPress тохиргооны файл
- Таны WordPress өгөгдлийн сан
Нөөцлөлтийн талаар дэлгэрэнгүй тайлбарлая
WordPress нь дангаараа таны сайтад зориулсан аюулгүй байдал болон нөөцлөлтийн системтэй ирдэггүй (гэхдээ та тэдгээрийг гар аргаар хэрхэн тохируулахыг сурч болох ч энэ нь маш их цаг хугацаа шаардана), тиймээс хүндрэлийг багасгах арга замыг олох нь таны хариуцах асуудал юм. Сайтаа шинэчлэх нь мэдээж хэрэгтэй зүйл (хэрэв та өөр залгаас нэмэх гэх мэт шинэ зүйл нэмэх эсвэл ямар нэг зүйлийг хасахыг хүсвэл), харин өгөгдлөө алдахыг хүсэхгүй л бол нөөцлөлт хийх нь зайлшгүй шаардлагатай (мэдээж та алдахыг хүсэхгүй байгаа). Сайтаа нөөцөлж, аюулгүй байдлыг чангатгах бусад шалтгаануудад хакер халдлагаас ангид байх баталгаа, мөн хэн ч таны сайтын өгөгдлийг хулгайлж чадахгүй байх явдал багтана.
“Үүнд ч гэсэн зориулагдсан залгаас бий.”
WordPress нь бүх төрлийн боломжуудад зориулсан үй олон залгаастай бөгөөд үүнд (тийм ээ, та зөв тааварласан) аюулгүй байдал, нөөцлөлтийн арга хэмжээнд зориулсан хэд хэдэн залгаас ч багтдаг. Сонгох боломжтой маш олон залгаас байдаг; илүү түгээмэл ашиглагддаг заримаас дурдвал BackupBuddy болон UpDraftPlus юм. Эдгээр залгаасууд (болон бусад)-ын талаарх сэтгэгдэл, үнэлгээ хаа сайгүй байдаг тул санаа зовох хэрэггүй – интернэтийн ид шид танд тусална. Бид хувьдаа дараах шалтгаануудын улмаас аюулгүй байдал болон нөөцлөлтийн аль алиных нь хувьд VaultPress-ийг ашигладаг:
- VaultPress-ийг Automattic бүтээсэн – үүнийг WordPress-ийг өөрийг нь үүсгэн байгуулсан– Мэтт Мулленвег үүсгэн байгуулсан юм. Automattic-ийн ихэнх бүтээгдэхүүн, үйлчилгээ нь найдвартай бөгөөд нэгэнт туршигдаж батлагдсан залгаасуудыг сонгон ашиглах нь хэзээд буруудахгүй.
- Ихэнх нөөцлөлтийн залгаасуудаас ялгаатай нь VaultPress нь хадгалах зай шаарддаггүй. Тэд таны өгөгдлийг өөрсдийн сервер дээр хадгалдаг тул та вэб хостоосоо “серверийн зай их эзэлж байна” гэсэн ямар ч анхааруулга авахгүй.
- Энгийн байдал. Үүнийг ашиглахын тулд та зөвхөн удирдлагын хэсэгтээ нэвтрэхэд л хангалттай бөгөөд тэндээсээ бүх нөөцлөлтийн мэдээллээ харж, үйлдлүүдийг хийж болно.
VaultPress нь бидний хувийн шаардлагад нийцдэг тул бидэнд төгс тохирдог. Гэсэн хэдий ч хэрэв та VaultPress-д сэтгэл хангалуун бус байвал шийдвэр гаргахад тань туслах зорилгоор WPBeginner, wpmudev зэрэг олон сайтууд харьцуулсан нийтлэлүүдийг санал болгодог.
Бүх зүйл танаас шалтгаална
Эцсийн эцэст вэбсайтынхаа аюулгүй байдлыг хангаж, нөөц хуулбар хийх эсэх шийдвэр нь таны гарт байна. Зарим хүмүүс хамгаалалтгүй сайтын авчрах эрсдэлийг даван туулж чадна гэдэгтээ итгэлтэй байдаг… зарим нь үгүй – үүнд буруудах зүйл үгүй. Эцсийн эцэст дараа нь харамсаж байснаас урьдчилан сэргийлсэн нь дээр шүү дээ.
Та ямар ч шийдвэр гаргасан бай, боломжуудаа сайтар дэнсэлж үзэхээ үргэлж санаарай. Эцсийн эцэст, өөрийн юуг даван туулж чадахыг зөвхөн та өөрөө л хамгийн сайн мэднэ.
Амжилт хүсье!